PROGRAMA "CAMIÑA E CONECTA"

 O 21 de NOVEMBRO de 2025 deu comezo a 𝙰𝙲𝚃𝙸𝚅𝙸𝙳𝙰𝙳𝙴 𝙵ⵊ́𝚂𝙸𝙲𝙰 – 𝙲𝙰𝙼𝙸𝙽̃𝙰 𝙴 𝙲𝙾𝙽𝙴𝙲𝚃𝙰 no noso centro, un programa dirixido a persoas maiores onde se realizaron paseos saudables dunha hora polas contornas do municipio, en compaña do alumnado dos catro ciclos do noso centro. A través del promoveuse a realización de actividade física e a socialización, fomentando a conexión entre diferentes xeracións, ao tempo que se compartiron pílulas informativas sobre hábitos de vida saudables.

A actividade realizouse os venres ás 10:30 horas aproximadamente.

Tralos paseos, en venres alternos no propio CEIP de Portosín, comparteuse unha merenda saudable entre todas as persoas participantes, resolvendo dúbidas sobre os alimentos utilizados, as cantidades recomendadas (prato de Harvard) e promovendo unha alimentación saudable entre a poboación.

Participouse nesta actividade no primeiro e segundo trimestre deste curso 2025-2026 organizado entre o Sergas e o concello de Porto do Son.

LECTURA E DEPORTE

No CEIP Portosín continuamos celebrando o Día do Libro coa nosa tradicional Carreira pola Lectura, que este ano chegou á súa décimo sétima edición e relizamos o 30 de abril deste 2026.

Foi unha xornada chea de participación, onde unimos lectura e deporte acompañados, como vén sendo habitual, polos compañeiros e compañeiras da Escola Infantil de O Parque e do CEIP Sobrado-Nebra. Ademais. Nesta edición innovamos cunha carreira de orientación para o alumnado de primaria, engadindo novos retos e aprendizaxes á experiencia.

Queremos agradecer especialmente ao ciclo medio de deportes do Concello de Porto do Son pola súa participación, así como ao Concello pola súa colaboración coa achega de auga e merendas.

Grazas tamén a todas as familias polo apoio constante. Actividades coma esta axudan a fomentar hábitos saudables e o gusto pola lectura desde as primeiras etapas.

Parabéns a todos e todas as participantes! Vémonos na seguinte!

DEPORTE E EDUCACIÓN VIAL

Este curso 2025-2026 todo o alumnado de educación primaria desfrutou dunha xornada de educación vial por trimestre acompañados de profesionais da DXT!

Na actividade recalcáronse normas básicas de circulación cando montamos en bici deixando claro que diversión e seguridade poden e deben ir sempre da man.

Aprendendo de maneira divertida!

Plan de Actividades Físicas e Hábitos Saudables

 INTRODUCIÓN

 Enmarcado dentro do Plan Proxecta + (iniciativa da Consellería de Cultura, Educación e Universidade), con este proxecto pretendese mellorar os hábitos de vida activa e saudable do centro, buscando o incremento diario de actividade física que realizan os nosos alumnos e alumnas, tanto dentro como fóra do centro. No CEIP Portosín, poñémonos en marcha para crear dinámicas e actividades dende os distintos equipos para fomentar a creación e adquisición destes hábitos orientados a consecución de obxectivos como:

• Incrementar a participación en actividades físico-deportivas en horario non lectivo.

• Manter ou mellorar o estado de saúde a través da adquisición de hábitos de vida activos e saudables.

• Potenciar os xogos motores como instrumento base da educación.

• Dar a coñecer aos nenos e ás nenas diferentes disciplinas deportivas mediante actividades lúdicas de carácter global.

• Fomentar a práctica de actividade física como hábito saudable necesario na sociedade actual..

• Loitar contra a inactividade física e o sedentarismo, creando hábitos que perduren fora do centro escolar e ao longo de toda a vida, dende a infancia ata a vellez.

• Dinamizar e promover os hábitos de vida activa e saudable, rentabilizando os recursos existentes na contorna do centro (públicos e privados).

• Seguir mellorando dentro do centro educativo unha filosofía de hábitos e conductas para una vida saudable.

• Dar a coñecer á comunidade educativa, a través dun blog, web do centro etc. de todas as accións que se realizan no marco da participación neste programa e como medio dinamizador dos obxectivos do mesmo.

• Utilizar as novas tecnoloxías para o fomento e seguimento de hábitos saudables.

  
  

XVI Carreira pola lectura

No CEIP Portosín seguimos celebrando o Día do Libro coa nosa tradicional Carreira pola Lectura, que este ano chegou á súa décimo sexta edición!.

Obradoiros sobre Saúde

 Este ano coma noutros anos, tivemos diversos obradoiros para aprender sobre o nos corpo e como coidalo. Para iso tivemos un :

• Obradoiro de saúde bucodental e saúde xeral da man de: Mónica (hixenista dental), Inés (doutora de atención Primaria) e Natalia (enfermeira).
• Obradoiro primeiros auxilios.

.            

Ademáis distos, fixemos un obradoiro para conmemorar o Día Internacional do Cancro Infantil, unha data para solidariedade e concienciación sobre esta enfermidade.

II Xornada de Convivencia Intercentros

 Este ano fixemos a II Xornada de convivencia intercentros co Ceip Sobrado de Nebra e o Ceip Alexandre Cadarso.

Merendas Saudables "Froitómetro"

O consumo de froita sempre é unha aposta segura para a nosa saúde, e por iso, seguimos apostando polo noso ‘foitómetro’.  Neste video podemos ver a entrega de premios aos estudantes que máis froita consumiron durante  o curso.

Roteiros 2024-2025

Pasiño a pasiño faise o camiño" Enmarcado tanto no PDI anual do centro coma no Proxecto vida activa e deportiva, iniciamos as primeiras etapas da nosa peregrinaxe.

     

Magosto 2024

Outro ano máis o tempo non nos acompañou pero isto non é motivo para non celebrar o noso "MAGOSTO".

Limpeza de Praias 2024

 Coma cada curso seguimos sumándonos a esta iniciativa proposta pola asociación ADEGA. Hoxe tivemos a XIII xornada de limpeza simultánea das praias da contorna que adiamos o pasado venres pola choiva: actuamos nas praias do Con, de Coira e da Gafa. Contamos coa axuda de varias familias e tamén coa do Concello que nos facilitou sacos do lixo e luvas para os adultos. Moitas grazas a todas/os!

III Feirón Mariñeiro

Durante todo este curso estivemos traballando o PDI de "Música e Arte" e a culminación deste proxecto vese reflexado neste vídeo do III FEIRÓN MARIÑEIRO. 

Agradecer de antemán a todos os organismos e persoas que se esforzaron e colaboraron para que este proxecto puidérase levar a cabo. 

Moitas grazas á ANPA, ó Concello, á Confraría de pescadores,  á Asociación de empresarios de Portosín e a todos os membros da Comunidade Educativa.

I Xornada de convivencia coa Escola de Nebra

Hoxe todo o cole de Portosín foi gozar dunha espectacular xornada de convivencia á Escola veciña de Nebra. Alí, a rapazada e os profes desta escola tíñannos preparados unha morea de xogos adaptados a cada idade. Con esta actividade  tanto os nenos e nenas  como  o profesorado puidemos coñecernos máis e  compartir novas experiencias.

Patios Activos

Tras unha exhaustiva análise do comportamento dos nosos alumnos durante o tempo de recreo vimos a necesidade de transformar os nosos patios en espazos máis activos e inclusivos.

Para conseguir que o proxecto fora viable e con posibilidades de levalo a cabo, propuxéronse espazos definidos para o desenvolvemento de diferentes actividades. Os espazos de xogo no patio distribuiranse en zonas e a cada curso tocaralle unha zona que será establecida nun calendario que estará posto en cada aula. En cada zona poderase xogar a determinados xogos:

• Xogos de pista: fútbol, baloncesto, voleibol...
• Xogos populares: tres en raia, á goma, carreira de chapas...
• Xogos de Rea: Brilé, a goma, a corda...

Deporte Inclusivo con Misela e Fundación Enki

O alumnado do segundo ciclo de primaria participou nunha xornada de deporte inclusivo impartida pola organización Misela. Os alumnos e alumnas xogaron ao bádminton, aos bolos, ao baloncesto, ao fútbol,... pero sempre con limitacións como por exemplo unha man atada atrás, con antefaces que lle impedían a visión ou poñéndose na pel dunha persoa que ten que facer uso dunha cadeira de rodas. Fomentamos así a importancia dunha inclusión real da xente discapacitada. Resultou unha actividade moi positiva e gratificante.

Este ano tivemos o pracer de contar no centro coa fundación ENKI de ocio inclusivo que se adican a axudar, a través do deporte e do ocio, a persoas con diversidade a sentirse parte da sociedade. Os representantes desta fundación contáronnos a súa situación persoal destacando as barreiras que atoparon polo camiño e como conseguiron sortealas, ademais de transmitirnos moitas mensaxes importantes.

Explicáronnos as diferentes adaptacións para practicar os deportes como triatlon, ciclismo, baloncesto ou atletismo. Trouxeron para mostrarnos unha bicicleta adaptaba que puidemos observar e manipular. 

Agradecer ao Concello por contar con nós e darnos a oportunidade de ser partícipes desta grandiosa actividade. Foi unha experiencia moi reflexiva e inspiradora.

Carreira pola Lectura

Coma todos os anos, seguimos conmemorando o día do Libro no Ceip Portosín. Unha vez máis unificamos o deporte e a animación á lectura festexando a XV Carreira pola lectura. Tivemos con nós uns participantes moi especiais da Escola Infantil de O Parque e tamén o alumnado e profesorado do Ceip Sobrado-Nebra. Pasámolo en grande e nada mellor que promover hábitos de vida saudable e, ao mesmo tempo, fomentar a lectura. Destacar o noso recoñecemento polo esforzo realizado por parte das familias e alumnado participante e o agradecemento á colaboración do Concello do Porto Do Son.  

No seguinte vídeo podedes gozar da carreira. 

Limpeza de Praias

Outro ano máis seguimos sumándonos a unha das iniciativas propostas por ADEGA.

Facendo a XII xornada de limpeza simultánea das praias da contorna: Coira, Gafa... 

Roteiros

Este ano en colaboración co PVAD, leváronse a cabo varias andainas polos arredores do centro para coñecer mellor a nosa contorna.

Nos seguintes vídeos podedes ver os diferentes roteiros feitos este curso:

Merendas saudables

A merenda é unha comida fundamental para os nenos, xa que está relacionada cun bo rendemento no colexio. Por iso dende o cole traballamos o fomento da alimentación

saudable dende os máis pequenos ata os maiores.

Este ano como novidade no centro fixemos o 1º Froitómetro que ten coma obxectivos:

1. Promover hábitos alimenticios saudables.
2. Aumentar o interese pola variedade de froitas.
3. Estimular a autonomía e a responsabilidade.
4. Crear un ambiente positivo ao redor da merenda.  
5. Proporcionar conciencia sobre a inxesta de froita.
6. Estimular o traballo en equipo e a participación familiar.

Esta actividade consiste en que en cada clase haxa un froitómetro por mes. Nel os nenos e nenas anotarán cunha X se trouxeron froita.  Ao rematar o mes o gañadores recibirán un agasallo ademáis dun diploma.  

Neste enlace podedes ver o video dos premios do froitómetro: